НИЙТЛЭЛ, ЯРИЛЦЛАГУУД

[Dondogoo]

ер нь цаадуул чинь хэнэггүй нь дэндсэн хүнд гарууд юмаа кккк хэн юу гэх бол яах бол гэж бодож байгаа ч юм алга

[Yago]

Энэ бөхчүүдийн ярилцлагуудыг нь уншихаар нэг л тийм ухаалаг, бодож байгаад цэгцтэйхэн ярьж байгаам.
Бөхийн өргөөнд хааяа дунд нь ороод бөх үзэж байхдаа илүү үгэнд дурлахаар арай л өөр байгаад байдаг. Сэтгүүлчдийн ур чадвар байх даа.

[21Grams]

Тэр мэдээж. Би энэ Гончигдамбыг мундаг дэмждэг боллоо. Сайхан бөх байна лээ. Хоёр Дамба ирэх наадмаар үзүүр түрүүнд зогсож байх болтугай.

[Yes Man]

Ха ха.... Сайн ярьдаг хүн ч байна..... Муу ч ярьдаг хүн байна.... Харин сэтгүүлч бол сайн бичдэг л байх ёстой.... Мэдээж хэрэг аа тэр тэгээд ингээд ийм тийм гэж ярьсныг нь хуулаад бичээд сууж байна гэж юу байхав дээ.... Гэхдээ гоёо ярилцлага бол сайн сэтгүүлч, сайхан ярьдаг хүн хоёрын дундаас гарч байгаа хэрэг шүү дээ....... Хичнээн сайхан яриад муу бичдэг хүн бол гоёо болгож чадахгүй..... Гоёо бичдэг байсан ч муу ярьдаг, бараг л ярьдаггүй хүнээс хүнд уншууртай сайн юм гаргаж авна гэдэг хэцүү.....
Нэг буудлагын багштай манай нэг ахмад сэтгүүлч яриа авч байсан чинь нөхөр Гүндэгмаа, Ундралбат билүү тэр хоёрыг муулж байна гэнэ..... Гүндэгмаа эхлээд секценд нь явж байгаад дараа нь сексэнд нь орсон гэж ярьсан гэдэг..... хэхэх.....

[Чуугий]

Аймгийн арслан Б.Батхуяг: Миний аав сумандаа арав түрүүлсэн сумын заан...


Дорнод аймгийн харьяат "Мак" сан, Дарханы төмөрлөгийн үйлдвэрийн бөх аймгийн арслан Басгаадайн Батхуягтай энэ удаагийн дугаарт хөөрөлдлөө. Арсланг "Алагдай Цэцэн" клубд хүчний бэлтгэл хийж байхад нь энэхүү ярилцлагаа хийлээ.

Тэдний клубд 2013 оны хүндийн өргөлтийн "паурлифтинг" төрөлд дэлхийн дээд амжилтыг эвдэж аварга болсон Э. Ууганбаяр, Дэлхийн аваргын мөнгөн медальт монгол улсын начин Д.Цогдолдорж нар бэлтгэл хийж харагдсан.

-Ярилцлагынхаа эхэнд Бөх сонин уншигчдад өөрийгөө танилцуулна уу?

-Би Дорнод аймгийн Баяндун суманд 1984 оны 5 сарын 13-нд айлын 5 дахь хүүхэд болж мэндэлсэн. Дороо нэг дүүтэй. Хүүхэд байхдаа бусадтай адил мал маллаж хөдөө өссөн дөө. Сумандаа наймдугаар ангиа төгсөөд, Дорнод аймгийн 12-р сургуулийг дүүргэсэн. Бэлтгэл сургууль хийж байгаад хотруу орж ирсэн.

-Бага байхдаа хэний барилдааныг үздэг байв?

-Хүүхэд байхдаа зургаан залуу зааны түргэн шуурхай, дайчин, уран барилдааныг нь үзэх дуртай байж билээ.

-Үндэсний бөхөөр хэзээнээс эхэлж барилдсан бэ?

-2001 онд өсвөрийн аймгийн аваргад оролцоод дөрөвдүгээр байр эзэлж байлаа. 2002 оноос тууштай бэлтгэл хийж барилдаж эхэлсэн.

-Анхны багш тань хэн бэ?

-Анхны багш Нэргүй гэж сумын заан байгаа.

-Таньд бөхийн удам байгаа юу?

-Миний аав сумын заан. Сумандаа нийт 10 түрүүлсэн. Завсаргүй 8 дараалж түрүүлсэн хүн байдаг. Манай суманд Аймаг сумын цолтой гаднаас олон бөх барилдаж байсан ч түрүүгээ алддаггүй байсан. Үндэсний бөхийн тэргүүн Р.Нямдорж, Д.Данзан нар оюутан байхдаа манай суманд барилдаж аавд маань унаж байсан гэсэн. Ааваасаа би барилдахыг нь өвлөж авсан гэж боддог.

-Анхны цолоо хэдэн онд авч байв?

-Дашбалбар суманд 2003 онд түрүүлж сумын заан болсон. Аймагтаа 2005 онд үзүүрлэж заан болж байсан. Харин аймгийн арслан цолыг 2008 онд хүртсэн. Хөвсгөлийн Энхзаяа аймгийн заан тухай үед аймгийн начин байлаа. Түүнтэй баруун золгоод давуулж гуядаж түрүүлсэн.

-Улсын баяр наадамд хэдэн удаа барилдаж байсан бэ?

-Зургаан удаа барилдсан. Хоёр удаа хоёр давсан, 2011 онд дөрөв давсан. Тавын даваанд Д.Рагчаа гарьдад унасан. Хамгийн анх ардын хувьсгалын 80 жилийн ойгоор хүүхэд байхдаа барилдаж байсан тэгээд Дорнод аймгийн Халх гол сумын харьяат аймгийн заан Н.Энхжаргал гэдэг хүнд унаж байсан.

-Улсын баяр наадамд сэтгэл зүй хэр байдаг вэ?

-Ер нь бол дажгүй тайван байдаг. Наадмын өмнөх орой гайгүй амарчихдаг. Тэгэхдээ бас бэлтгэл сайн байгаа үед жаахан гэгэлзэх тал бий.

-Заал танхимын барилдаанд нэг их харагдахгүй байх шиг?

-Тиймээ бэртэлтэй байгаа болохоор тогтмол барилдаж чадахгүй байна. Одоо ерөнхийдөө барилдаануудад оролцох санаатай байна. Ойрын 3 жил завсартай барилдлаа.

-Танай Дорнын барс дэвжээний бөхчүүд бэлтгэл сургуулилтаа хаана хийж байна?

-Үндэсний бөхийн бэлтгэлээ Хан уул дүүргийн спорт зааланд мягмар, пүрэв гарагт хоёр цагаас хийж байгаа. Манай дэвжээний бөхчүүд улсын начин Д.Цогзолдорж, Ж.Гансүх нарын удирдлага доор бэлтгэлээ хийдэг. Одоогийн байдлаар манай дэвжээнд 30 гаруй бөхчүүд бэлтгэл сургуулилт хийж байна.

Манай аймгаас барилдаж байгаа бөхчүүд гэвэл а.а Түмэнжаргал, Мөнхбат а.н Нямсайхан, Ариунмөрөн, Анар гэх мэт сайн барилдаж байгаа бөхчүүд бий. Ер нь барилдаж, бөх болох хүсэл эрмэлзэлтэй нутгийн хүүхэд залуучуудад манай дэвжээ нээлттэй.

-Үндэсний бөх болон хүчний бэлтгэлээ долоо хоногт хэрхэн зохицуулж байна?

-Дөрвөн өдөр үндэсний бөхийн бэлтгэл, хоёр өдөр нь хүчний бэлтгэл хийж байна.

-Үндэсний бөхөөс гадна өөр их спортуудаар хичээллэж байв уу?

-Аварга дээд сургуульд байхдаа жүдо, самбоор хичээллэж тэмцээн уралдаанд оролцдог байсан. 2007 онд Аварга дээд сургуулийг жүдо бөхийн багш, дасгалжуулагч мэргэжлээр төгссөн.

-Танай ангиас цолонд хүрч сайн баилдаж байгаа ямар бөхчүүд байна даа?

-Архангайн у.н Р.Лүрэвдагва, Өвөрхангайн а.а Д.Батторж, а.х И.Зоригтбаатар а.н Дамдиндорж нар байна даа. Мөн Түвшинбаяр Энхбат бид хэд чинь нэг үе тэнгийн бөхчүүд. Аварга дээд сургуулийн байранд хамт амьдраад цуг бэлтгэл сургуулилтаа хийдэг байсан.

-Таны биеийн өндөр, жин хэдтэй байна?

-Өндөр 184 см, жин 127кг

-Та паурлифтинг буюу хүчний гурван төрлөөр хэзээнээс эхэлж хичээллэв? Клубынхаа талаар ярина уу?

-Хүчний бэлтгэл хийгээд хоёр жил болж байна. Тэмцээн уралдаанд нэг их орсон юм байхгүй. Манай клубийн хувьд паурлифтингийн төрлөөр үйл ажиллагаагаа явуулдаг Алагдай цэцэн клуб. Монгол улсын шилдэг тамирчид энд бэлтгэл хийж байна. Дэлхийн аваргад түрүүлж медаль авч байсан тамирчид байгаа.

-Таны барилдааны талаар ярилцъя?

-Ерөнхийдөө баруун талтай. Шуудагны барьцнаас давамгай барилддаг. Давуулж гуядах мэх хийдэг.

-Таны сэтгэлд хоногшин үлдсэн барилдааныхаа тухайд...?

-Улсын баяр наадамд дөрөв даваад явж байхад сайхан байсан даа. Цогтжаргал начинтай барилдсан. Барилдааны тухайд надаас барьц сонгосон байсан. Тэгээд начин тахимдаад өөрөө суначихсан.

-Начин цол таны хувьд хэр ойрхон байсан?

-Ойрхон байсан. Тавын давааг тэр болгон аавын хүү даваад байдаггүй. Маш хянуур анхааралтай барилдахгүй бол хэцүү. Жаахан анхаарал алдвал унадаг л даа. Рагчаа гарьдтай давхар шуудганд хүрч барилдаад, гарьд сугадаад зайлж давсан.

-Харамсаж явдаг барилдаанаас дурдвал...?

-Улсын баяр наадмын барилдаанд 2009 онд хоёрын даваанд а.а Мэндбаярт барьцгүй шахуу тахимдуулаад унаж байсан. Ер нь унасан барилдаан болгондоо харамсдаг л даа. Дараа нь гэртээ очоод бодоход тийм юмнаас болоод уначихжээ гэж дүгнэлт хийдэг. Бас найз нөхөд маань чи тэгж барилдаад байна, ингэж барилд гээд зөвлөгөө өгнө дөө. Мөн аав маань бас зөвлөгөө өгнө.

-Бөхчүүдийн хөгжилтэй явдлуудаас ярьж өгнө үү? Уншигчдад маань сонирхолтой байх?

-Манай нэг бөх хотод оюутан болоод зааланд барилдсан гэнэ. Тэгээд шөвгийн дөрөвт үлдээд гэртээ очоод найзуудыгаа дуудаад баяр тэмдэглэж, монгол намайг мэддэг боллоо гээд ахиж барилдаагүй гэсэн. Тийм л нэг хөгжилтэй явдал байна даа.

-Гэр бүлийнхээ талаар танилуулахгүй юу?

-Би эхнэр хүүтэйгээ хамт амьдардаг. Миний эхнэрийг Хонгорзул гэдэг Хэнтий аймгийн хүн байгаа.

-Таны амьдралдаа баримталдаг зарчим ?

-Үнэн ч шудрага байвал болно гэж боддог.

-Өөрийгөө ямар авьяастай гэж боддог вэ?

-Дуулах л юм даа.

-Чөлөөт цагаараа сонирхдог зүйг хобби тань юу вэ?

-Хөдөө сайхан салхинд гарах Спортын суваг үзэх сайхан. Тэр тусмаа сагсан бамбөг NBA үзэх дуртай. Indiana Pacers, San Antonio багийг дэмждэг.

-Ирээдүйн зорилгоо хуваалцана уу?

-Бэлтгэлээ сайн хийгээд улсын цолонд хүрэх зорилготой доо .

-Манай сониноор дамжуулж хүндэлж явдаг хүмүүсдээ мэндчилгээ дэвшүүлнэ үү?

-Бөх сониноороо дамжуулаад аав ээж болон нутгийнхаа ард түмэн, найз нөхөд,УИХ-н гишүүн Н.Номтойбаяр, Цагдаагийн хурандаа Н.Манлайбаатар болон дэмжиж тусалдаг бүх хүмүүст мэндчилгээ дэвшүүлье.

Арсландаа улсын цол авах болтугай гэж ерөөгөөд энэхүү ярилцлагаа өндөрлөе.

МУБИС-БТС Б.Нанзаддорж

Эх сурвалж: “Бөх” сонин

[MANDAKHT]

Б.Пүрэвсайхан: Бөх хүн жудагтай, нэр цэвэр байх учиртай

Энэ удаагийн дугаарын зочноор Ардын хувьсгалын 91 жилийн ойн баяр наадмаар тав давж улсын цолтны эгнээнд бүл нэмсэн Ховд аймгийн Чандмань сумын харьяат “Нью прогресс” групп, “Сүлд” спорт хорооны бөх улсын начин Баатархүүгийн Пүрэвсайханыг урилаа.

Ярилцлагыхаа өмнө бяцхан оршил болгоход тэрээр Үндэсний бөхийн холбооноос сар бүр гаргадаг чансааны хоёрт эрэмбэлэгдэж өндөр цолонд хүрэх ирээдүйтэй хэмээн үнэлэгдэж байгаа юм.

-Сайхан хаваржиж байна уу. Та морин жил гарснаас хойш сүүлийн хэдэн барилдаанд тогтмол шөвгөрлөө. Бэлтгэл сайн байгаа бололтой?

-Наадам болоход тун бага хугацаа үлдлээ. Тэр энэ гэлтгүй бөхчүүдийн бэлтгэл жигд тэгширсэн байгаа нь барилдаануудаас харагдаж байна.

-Өөрөө бусад бөхчүүдээс бие жижиг хэрнээ дайчин, шуурхай барилдаанаараа эрс ялгардаг. Том биетэй бөхтэй бүр ч сайн барилдаад байх шиг харагддаг?

-Учраа бөхөө аль болох хөдөлгөж, хурдтай барилдахыг хичээдэг. Миний биеийн өндөр 177 см. Иймд өөртөө таарсан барилдааны ур чадварыг улам сайн хөгжүүлэх нь чухал гэж боддог.

Нас залуу байна. Гаргасан алдаагаа засах хугацаа надад хангалттай бий.

-Багш гэснээс таныг бөхийн зам руу анх хөтөлж оруулсан хүн улсын заан Ч.Батзориг хэмээн бөхийн хүрээнийхэн ярьдаг?

-Батзориг заан аавын минь төрсөн дүү юм шүү дээ. Би 2007 оны хавар арваннэгдүгээр анги төгсөх жилээ Ховд аймгийнхаа “Ховд” их сургуульд нягтлан бодогч мэргэжил эзэмшихээр анх шалгалт өгч байлаа. Тэр зун Ховдод даншиг наадам болоход Батзориг ах манайд ирээд “ерөөсөө чамайг хот руу авч яваад бөх болгоно” гэдэг байгаа. Тэгээд намар нь “Аварга” дээд сургуульд Үндэсний бөхийн багш, дасгалжуулагчийн ангид улсын начин Адьяахүү багшид шавь оруулж билээ.

-Тэгэхээр та бөх рүү хожуу оржээ дээ?

-Улаанбаатар руу явдаг жил үндэсний бөхийн аймгийн аварга болж байлаа. Түүнчлэн улсын аварга шалгаруулах тэмцээнд 13 дугаар байрт орсон. Бага насандаа адуу, малтай ноцолдож өссөн болохоор бөх болох эхлэл тэнд л тавигдсан юм болов уу.

-Таныг улсын аваргад орж байхад өнөөгийн алдар цуутай бөхчүүдээс хэн зодоглож байв?

-Дээд насны ангилалд одоогийн улсын арслан П.Бүрэнтөгс сайн үздэг байсан. Харин бага насны ангилалд улсын начин А.Батмөнх, Төв аймгийн н.Ган-Идэр нар барилдаж байлаа.

-Хэрэв Ч.Батзориг заан таныг бөхийн зам руу хөтлөөгүй бол Б.Пүрэвсайхан өдийд хаана, юу хийж явах байсан бол?

-Нутагтаа л ажиллаж байх болов уу.

-Нягтлан бодогч мэргэжлээр шалгалт өгснийг бодоход та сурлага сайтай хүүхэд байж дээ?

-Хааяа нэг олимпиадад орно. Ер нь нийгмийн талын хичээлдээ давгүй шүү.

-Хэдийд анхны цолоо авсан бэ?

-Үндэсний бөхөөр хоёр жил хичээллэсний дүнд 2009 оны наадмаар Эрдэнэбүрэн суманд түрүүлж сумын заан болсон. Нөгөөдөр нь Чандмань сумынхаа наадамд дахин түрүүлж шинэ цолоо баталсан. Түүнчлэн хэдхэн хоногийн зайтай аймгийн наадам болж би дахин зодоглож аймгийн заан цол авсан. Дараа жил нь аймагтаа түрүүлж аймгийн арслан болсон доо.

-Улсын начин цол авсан үеэ эргэн дурсахгүй юу?

-Батзориг ах намайг гурав дээр авч даваа хөнгөлж өгсөн. Дөрвийн даваанд гарьд Ж.Бат-Эрдэнэтэй оноолт таарсан. Би давсан. Тэгээд тавын даваанд Булганы Д.Баасандорж зааныг давж, улсын начин цол хүртсэн дээ. Тэр наадмаар Бат-Эрдэнэ гарьдтай таарна гэж ер бодоогүй. Бид хоёр заалны барилдаанд хоорондоо цөөнгүй таарч, өгөө аваатай л байсан. Хүчтэй гарьдаар дөрөв давчихаад их баярлаж билээ.

-Та өнгөрсөн жи­лийн наадмаар бөх сонирхогчдын санасан хэмжээнд хүрч барилдаа­гүй. Хатуухан хэлэхэд та цолоо хамгаалж чадаагүй. Үүнд юу нөлөөлсөн бэ?

-Наадмын өмнөх бэлтгэлд миний шагайны шөрмөс тасарсан. Тун хэцүү. Арга ядаад хөлөндөө гипстэй барилдсан. Хөлний бэртэл эдгээгүй тул хүчилж барилдаагүй ээ.

-Төрийн наадамд тав даваад туг тойрох сайхан биз?

-Яриангүй сайхан. Гэхдээ улсын цолтой бөхийн үүрэг хариуцлага туг тойрохтой адилгүй. Бүх талаараа тэгш, хийгүй, нэр цэвэр байх ёстой юм байна лээ. Би үүнийг сайн ойлгож авсан.

-Барилдах эрхээ хоёр сараар хасуулах тэр үед үү?

-Тийм ээ /инээв/

-Санаанаас гардаггүй харамсалтай барилдааныг нэрлэхгүй юу?

-Нас залуу байна. Гаргасан алдаагаа засах хугацаа надад хангалттай бий.

-Та шуудагны барьцнаас ямар ч бөхтэй сайн барилдаж байгаа харагддаг. Ялангуяа таны хоёр шууны бярыг бөхчүүд шагшин ярьцгаадаг?

-Тал бүрийн хүчин зүйл нөлөөлдөг байх. Аавын удамд гартаа тэнхээтэй хүн байсан гэдэг. Мөн би ээжийнхээ мээмийг 12 нас хүртлээ хөхөж өссөн хүн дээ. /инээв/

-Өөрөө айлын отгон хүүхэд үү?

-Тийм ээ. Би дээрээ ганц ахтай.

-Танай удамд Ч.Батзориг заанаас өөр барилддаг хүн бий юү?

-Манай аавын талын эрчүүд бараг бүгд барилддаг. Батзориг ахын дүү аймгийн начин Ганболд, түүний дүү Мөнхзориг сумын заан. Авга ах нарынхаа зааж сургасан эрдэм, мэдлэгийн хүчинд би өдий зэрэгтэй барилдаж явна. Тэд маань түмэн олноо баясгаж, бөхийн ёс жудгийг сайн сахиж, биелүүлж явсны ач буян удамд нь эерэгээр нөлөөлсөн юм байлгүй дээ.

Д.Жавхлан
http://www.ikon.mn/n/5iv

[jal]

Гончигдамбын Өдрийн сонинд өгсөн ярилцлага үнэхээр таалагдлаа... Сэтгүүлч нь ч жаахан хачир нэмсэн байх шиг байн.. гэхдээ л гоё болжээ. энд тэнд байвал оруулчихвал..

[1220]

УЛСЫН ГАРЬД Д.БАЯРАА АГСНЫ ГЭРГИЙ С.АЛИМАА: ХАНЬ МИНЬ

Бөх сонин энэ дугаараасаа эхлэн "Дурсахуй" гэж шинэ булан нээж байна. Энэ буландаа үе үеийн алдарт бөхчүүдийн хань ижил, үр хүүхэд, ахдүүсийнх ньхалуун дурсамж, сэтгэлийн үгсийг хүргэж байх болно. Үнэндээ бид хорвоогоос эрт буцсан эарим нэг бөхчүүдийнхээ нэр, цолыг нь мэдэхээс цаашгүй болчих үе байдаг.

Цагтаа цалгиж, үзэгч олноо баясгаж явсан тэдний зам мөр, тэнгэрлэг барилдаан, дүр төрх нь бидний сэтгэлд үргэлж гэрэлтэж явах учиртай. Шинэ булангийн маань анхны зочин Д.Дамдин аваргын хүү, улсын гарьд Д.Баяраагийн гэргий Санжайжавын Алимаа байв.

Д.Баяраа гарьд 1979 онд улсын начин, 1988 онд улсын заан цол хүртэж, 1984 онд 5, 1986 онд 6, 1989 онд 5, 1991 онд 6 даван шөвгөрсөн агаад 1990 онд Монголын нууц товчооны 750 жилийн ойн наадамд 8 давж шөвгийн гуравт үлдэн заан цолоо баталсан юм. Энэ амжилтыг үнэлж, 2004 онд Ерөнхийлөгчийн зарлигаар Улсын гарьд цол олгосон түүхтэй.

-Танд энэ өдрийн мэнд хүргэе, манай уншигчдад өөрийгөө танилцуулна уу?
-Бөх сониныхоо нийт уншигчдад энэ өдрийнг мэнд хүргэе. Миний аав Өвөрхангай аймгийн Хужирт сумынх, ээжий минь Өлзийт сумын уугуул. Би аавыгаа Сэлэнгэ аймгийн Зүүнбүрэнгийн САА-н дарга байхад төрж хотод өссөн. Би арьсны технологич мэргэжилтэй. Мэргэжлээрээ бараг ажиллаагүй дээ. Олон нийтийн байгууллагад ажиллаж байгаад тэтгэвэртээ гарсан.

-Ханьтайгаа танилцаж байсан тэр сайхан үеийг эргээд нэг дурсана уу?
-Бид хоёр 1979 онд танилцсан. Манай хүн Дэлхийн залуучуудын аварга шалгаруулах тэмцээнд орох гээд Тэрэлжид бэлтгэл хийж байх үеэр би тэнд амарч байж таараад анх бараа бараагаа харсан.

-Анх харахад ямархуу залуу нүдэнд тань торсон бол ?
-Нэг өглөө усны өрөө рүү гүйгээд очтол шорттой тамирчин залуу өөдөөс гараад ирсэн. Тэгсэн би яг өмнө нь хөл алдаад сөхрөөд уначихгүй юу. Сандарсан, ичсэндээ дэмий л нөгөө залуу руу хараад инээсэн чинь өнөөх чинь юун татаж босгох бүр нүүр буруулаад яваад өгсөн. Тухайн үед "Ямар сонин залуу вэ, эмэгтэй хүн бүдрээд унаж байхад татаад босгох байтал..." гэсэн юм бодоод л өнгөрсөн.
Тэнд бид 2 албан ёсоор танилцаагүй юм аа. Тэгээд л удалгүй амралтын хугацаа дуусч би буцсан. Би 40 мянгатад төрж өссөн хүн л дээ. Сүүлд 40 мянгатын автобусны буудал дээр дахиад өнөө залуутай тааралдлаа.
Тэгсэн мэндэлж байна аа. Би ч "Таньдаг ч юм шиг. Хүн унахад татаад ч босгоогүй байж" ухааны юм бодож байгаа юм чинь. Ингэж л танилцсан. Сүүлд суусан хойноо "Тэгэхэд чи яагаад намайг татаад босгоогүй юм бэ" гэж асуусан чинь "Гэв гэнэт өмнө нэг их сайхан хүүхэн бүдрээд уначихаар ичээд нүүрээ буруулаад явчихсан" гэж билээ.

-Хэдийгээр татаж босгоогүй ч гэсэн таныг анзаарч харсан л байж дээ?
-Тийм юм байлгүй /инээв/. Тэрэлжид байх хугацаанд намайг анзаараад л мэдээд байсан юм шиг байгаа юм. Би болохоор "хүн унаж байхад татаж босгоогүй залуу" гэсэн шүү юм бодоод өнгөрсөн. Бид хоёр танилцаад нэг их удаагүй гэр бүл болсон доо. 1979 онд.

-Дархан аваргын хүү, бас өөрөө барилддаг гэдгийг нь хэзээ мэдэв?
-Манай хүн чинь 1979 оны 7сард наадмаар начин болоод 8 сард нь бид хоёр Тэрэлжид таарсан хэрэг. Гэхдээ би тэр үед бөх хүний хүүхэд, өөрөө улсын начин цолтой бөх гэдгийг нь огт мэдээгүй. Чөлөөт бөхийн л тамирчин юм байх гэж бодсон.
Сүүлд үерхэж байх хугацаандаа л мэдсэн. Манай хүн чинь төрөөд 10-хан сартайдаа Хөвсгөлийн Цагаан-Уүр суманд аавынхаа ээж Дарь гуайнд очоод 19-тэй цэрэгт иртлээ эмээтэйгээ амьдарсан юм билээ.

-Гэр бүл болох саналаа танд хэрхэн хэлсэн бэ, танд?
-Ёстой нэг эр хүн шиг хэлсэн дээ. Би заавал чамтай сууна гэж. Хүн шууд тулгаад хэлчихээр хэлэх үг олддоггүй юм билээ. Би суухгүй гэлтэй биш... /инээв/. Өмнө уулзах гээд ирэхдээ бээлийгээ л "идээд" байдаг байсан. Сүүлд чи яагаад бээлийгээ идээд байдаг байсан юм бэ гэхээр "Тэгэлгүй яах юм бэ. Чи нэг их том нүдээр өөдөөс тас ширтээд байхаар ичээд, сандраад тэр..." гэдэг байсан.

-Та ямар зан чанарыг нь онцолж анзаарав?
-Эр хүнд байх ёстой бүх зан чанар ханьд минь байсан шүү. Юманд хүлээцтэй, даруу төлөв, чиглэсэн сонгосон зүйлдээ зоримог дайчин.

-Заан цол цол авахад нь та хүү төрүүлж давхар баярлуулсан гэдэг байх аа?
-Заан болсон тэр наадам их дурсгалтай. Бид дөрвөн охинтой, 5 дахь хүүхэд төрөх гээд байж байсан үе. Наадам тулчихсан. Манай хүн Баянчандманьд бэлтгэлд гарчихсан байв. Санаа нь зовоод л Баянчандманий төв дээр ирж надтай утсаар ярьж, өвдөж байна уу гээд л асууна.
Тэгээд 7 сарын 10-нд бэлтгэлээсээ бууж ирээд 11-ний орой нь би өвдөж эхэлсэн. Эхэндээ ч нөхрийгөө санаа нь зовчихно гэж бодоод нуулаа. Бүр өвдөөд болдоггүй. Охидууд ч "Ааваа, ээж өвдөөд байна" гээд гүйлдэхгүй юу. Төрөхөд хүргээд мань хүн үүдэнд сахиад үлдсэн. Эргэлтийн хаалганы цонхоор очоод хартал хань минь суугаагаараа унтаж байна аа.
Тэгэхээр нь дуудаад "Намайг одоо төрөхгүй гэнэ. Маргаашнаас нааш төрөхгүй юм байна, харьж амар" гэж худлаа хэлээд явуулчихсан. Тэгсэн 12-ны үүрээр хүү минь төрсөн дөө. Хадам аав минь тэгэхэд "За хүү минь наадмын өглөө хүүтэй болсон хүнд зориг л дутна уу гэхээс аз хийморь дутна гэж байхгүй шүү" гэж хэлсэн юм гэдэг.

-Гарьд өөрөө бас наадмаар төрсөн гэдэг билүү?
-Наадмын дараа 14-нд төрсөн юм билээ. Тэр үед наадам 3 өдөр болдог байсан юм болов уу даа. 1950 хэдэн онд. Аавыгаа улсын наадамд 2 дахь түрүүгээ авахад нь төрсөн гэдэг юм.

-Заан болчихоод хүү дээрээ бөөн баяр ирсэн үү?
-Тэгэлгүй яахав. Төрөх даяараа л баяр хөөр болсон. Эмч сувилагч нар "сая заан болдог залуугийн эхнэр хүүхэд хаана байна" гээд л, ирж баяр хүргээд. Аавыг нь заан болоод туг тойрч байхад нь нэвтрүүлэгч Ганбаатар "Баяраа маань өнөө өглөө хүүтэй болсон, давхар баяр тохиолоо" гээд зарлахад стадион даяар шуугиж, алга ташин баяр хүргэсэн гэдэг юм.

-Төрмагнай гэдэг нэрийг их л учир утга бодож өгсөн байх даа?
-Өвөө нь /дархан аварга Д.Дамдин/ тэр жил зүүний магнайд гарсан. Тэгээд төрийн наадмын магнай болж яваарай гэсэн утга, бэлгэдлийг бодож Төрмагнай гэдэг нэр өгсөн юм.

-Хүү тань та хоёрыг бас багагүй хүлээлгэж байж төржээ?
-Тийм шүү. Дөрвөн охины дараа хүү минь төрсөн. Би охин хэд ч төрсөн хамаагүй, хүү гартал нь төрөөд л байя гэж боддог байлаа шүү дээ /инээв/.

-Гарьд хүүгээ бөх болгох талаар ярьдаг байв уу?
-Миний хүү чинь 3 настайгаасаа аавыгаа дагаж наадмын бэлтгэлд гарсан хүүхэд. 23-р сургуульд сурч төгссөн. 9-10-р анги төгсөтлөө бөмбөг хөөгөөд явж байг, 10 төгсөхөөр нь арай өөр зүйлд сургана аа гэдэг байсан. Одоо бодоход бөх рүү аажуу оруулъя гэж бодсон юм шиг байна лээ.

-Амьдралд баяр гуниг, зовлон жаргал ээлжилдэг нь жам. Ялангуяа тамирчдын ар гэрийнхэн хэцүү бэрхийг бусдаас илүү тэвчих шаардлага гардаг юм уу даа?
-Тийм шүү дээ. Би чинь анх суухдаа айлын эрх танхи охин байлаа. Гэр бүл болсны дараа амьдрал ёстой буцалж байгаа юм. Манай хүн их спортоор хичээллэдэг, зав чөлөө тун бага. Хүүхдүүд маань ойр ойрхон гарчихсан. Хүүхдийн бие муудаад "гэр бүлийнхээ хүнийг дууд" гэх үед нөхөр маань маргааш нь олон улсын тэмцээнд алтын төлөө барилдах болсон байх жишээтэй.
Тийм үед гүрийгээд л ганцаараа даваад гарахаас өөр аргагүй шүү дээ. Бишгүй л их зовлон тохиолдсон. 1983 онд Дэлхийн залуучуудын аваргад нөгөөдөр явна гэж байхад нь манай нэг охин өнгөрч байсан. Улсын зардлаар бүтэн жил тэр тэмцээнд бэлдчихсэн хүн чинь явахаас өөр аргагүй. Урд орой нь надад "Чи л шийд" гэхээр нь "Яв даа, нэгэнт алдчихсан үр минь босоод ирэх биш" гээд л явуулсан. Амьдрал хүнийг хатуужуулдаг юм билээ.

-Гарьд чөлөөтийнхөө хажуугаар үндсээр тогтмол барилдаж амждаг байсан болов уу?
-Бөхдөө хачин их дуртай. Их Шигшээд байх үед нь үндэсний бөхөөр барилдахыг бараг хорьдог байсан. Амралтын өдрүүдээр багш нараасаа нуугдаж ирээд үндэсний бөхийн барилдаанд оролцдог байлаа. Гэртээ зодог шуудгаа авах гээд ирэхээр нь би заримдаа хориглоно оо. "Жаахан амар" энэ тэр гээд. Өдөр 2 цаг болоод ирэхээр "Хорхой хүрээд байна, хөгшин нь барилдчихаад ирье" л гэнэ. Тийм дуртай. Тэр үед олон сайхан аварга, арслангууд ид барилдаж байсан үе. Барилдаан нь ч их сонирхолтой, өрсөлдөөнтэй болдог байж.

-Та хааяа дагаж очоод бөх үзэх үү...?
-Ойрхон олон хүүхэд гаргачихсан би гэдэг хүн барилдааныг нь тэр болгон үзэж амждаггүй байв. Наадмаар хэдэн хүүхдээ дагуулаад "бөх хурдан дуусаасай" гээд л стадион тойроод өнжинө шүү дээ. Манай хүн улсын наадамд үеийнхнээсээ арай олон жил барилдсан, дор даваанд унана гэж байх биш. Өдөржин л стадионы гадуур нь эргэлдчихдэг байлаа.

-Хувь хүнийхээ хувьд ямархуу зан араншинтай хүн бэ?
-Ер нь зоримог зантай, хурц барилдаантай хүн. Тэгсэн хэрнээ амьдрал дээр их зөөлхөн. Хүүхдүүддээ гар хүрэх нь битгий хэл ширүүн ч харж үзээгүй дээ. Хүүхдээ надаас хүртэл өмөөрнө, гэр бүлээ бусдаас их харамлана.
Сүүлд чөлөөтөө орхиод арай зав чөлөөтэй болсон үедээ хоол их гоё хийдэг байсан шүү. Маш цэвэрч. Эмээ нь Оросын буриад хүн байсан учраас багаас нь маш нямбай, цэгцтэй, цэвэрч болгож хүмүүжүүлсэн. Их гэнэн цайлган сэтгэлтэй. Жаахан хүүхэд шиг. Хэрвээ бөх болоогүй бол нисгэгч болох байсан гэж ярьдаг юм. Бас хэрвээ монголд далай байсан бол усан онгоцны жолооч болохсон... гэнэ.

-Тухайн үед хүмүүс "Дархан аваргын хүү сайн барилдаж, түрүүлэх ёстой" гэж шахдаг байсан болов уу?
-Яг өөрт нь тэгж хэлж байсан үгүйг мэдэхгүй юм аа. Гэхдээ хэн юу ч гэж хэлсэн автахгүй, өөрийнхөөрөө л байдаг хүн дээ.

-Барилдааныхаа тухай танд ярих уу?
-Ярина аа. Ярихдаа их хөөрхөн юм ярина. Манай хүн чинь өнгөртлөө барилдсан юм шүү дээ. Их хурдан шуурхай барилддаг хүн чинь сүүлдээ их удаад зуураад байдаг болчихсон. "Миний хөгшин яагаад л зуураад байдаг юм дээ„," гэхээр "Аа, яахав, унасан ч цааш нь даваагүй болгож байж унана шүү" гэнэ. Тэр үг нь надад их таалагддаг байсан.
Яагаад гэхээр шантардаггүй байсан байхгүй юу. Тэрнээс биш за, за би ямар давах биш барилдахаа болъё гээд бүр боливол больчихно шүү дээ. Хамаг бяр чадлыг нь дуустал зуурна гэдэг бас л шийртэй, мундаг байгаагийн шинж гэж боддог байсан. Нэг удаа манай охин аавтайгаа хамт очин бөх үзэж. Аав нь 45-46 хүрчихсэн байсан үе л дээ.
Тэгсэн охины маань урд суусан залуу бөхчүүдээс нэг нь "Баяраа заантай таарчихаж. Хөгшин бөхийг дор нь хаячих" ухааны юм яриад гарснаа удаа ч үгүй уначихаад ороод ирж. Найз нар нь чи хөгшин бөх дийлсэнгүй юу... гэхэд нөгөө залуу "Юу ярьж байгаа юм. Хоёр гар нь аймаар юм байна, дийлсэнгүй" гэж.
Тэгсэн аав нь дороос "Миний охин хувцас аваад ир" гээд дуудахгүй юу. Охин маань гэртээ ирээд "Ээжээ хүн суудал дээрээ шууд агшдаг юм байна лээ. Тэд нар шууд агшаад би тэд нар руу харж инээд алдаад л буусан" гэж билээ /инээв/.

-Тэр сайхан бөхийг усанд үйчихсэн гэх хар мэдээ сонсоход нэг л итгэмгүй санагдаж байсан...?
-Тэр жил Хөвсгөлийн хүчтэн дэвжээнийхэн анх удаа Сүүж уулын амралтанд бэлтгэлд гарсан юм. Бүгдээрээ наадмын өмнө тамирчдын баярын барилдаанд ирж барилдсан юм билээ. Бөх тараад надруу залгаад "Энд хүүтэйгээ уулзчихлаа. Одоо унаанаасаа хоцрох нь. Буцаад бэлтгэл рүүгээ явлаа" гэж хэлсэн.
Тэгсэн нэг найз нь таараад хамт Хөвсгөл явчихаад ирье гээд дагуулаад явчихсан юм билээ. Над руу Эрдэнэт, Тосонцэнгэл хоёроос нэг нэг ярьсан. Сүүлийн удаа ярьж байгааг нь яаж мэдэх билээ. Тэгсэн 7 сарын 8-нд хүн надруу яриад тийм юм болчихлоо гэж хэлсэн. Гэнэт тийм мэдээ сонсох чинь үнэхээр хүнд юм билээ. Охин, хүргэн хоёртойгоо нисч очоод шарилыг нь авчирч энд нутаглуулсан даа.

-Дараа нь усанд их сайн сэлдэг байсан,,, энэ тэр гэсэн дэл сул яриа дуулдаж байсан?
-Шигшээд байхдаа Оюунболд гавьяат, манай хүн хоёрыг Москвагийн бассейнд гайхмаар сайн сэлж байсан гэж сонссон болохоос энд гол усанд сэлж байхыг нь би хараагүй л дээ /Нулимстай, харуусалтай ярилцлагын маань хамгийн хүнд хэсэг байлаа/.

-Танайх чинь нэг хэсэг Хөвсгөлд амьдарсан уу?
-Үгүй ээ. Манай хүн л Цагаан-Уул сумын засаг даргаар 6 cap очиж ажилласан. Удаагүй.,Тэнд ажиллаж байх хугацаанд нь би очиж cap гаруй хамт байсан. Их сайхан нутаг л даа. Зургаан сарын дараа нэг өдөр утасдаад "Болъё хө, гэртээ харьж явна" гэж ярьж байсан. Болмооргүй санагдсан байх.

-Та нөхрөө ид барилдаж байхад ажил хийж байв уу, гэртээ хүүхдүүдээ өсгөх үү?
-Ажлаа хийгээд л явдаг байсан. Төрчихөөд 45 хоноод л ажилдаа орно. Том нь охид юм болохоор дороо тусд ороод, дүү нараа өсгөлцөөд явчихдаг байсан. Нөхрийнхөө амжилтын төлөө чадах чинээгээрээ л зүтгэж, халамжилсан даа. Дарханд байдаг а.а Наранцогт гэдэг найз нь ирэхээрээ "Чамд заан цол багадахаар юм байна. Чи арай дэндүү халамжинд амьдарч байна шүү" гэж хэлж байсан удаатай.

-Би сая та хоёрын залуугийн зургийг хараад ямар сайхан хос байгаа вэ гэж дотроо өөрийн эрхгүй дуу алдаж суулаа?
-Бид хоёрыг үеийнхэн маань сайхан хос гэдэг байсан шүү. Өөрсдөө гоё сайхнаа ч нэг их мэдрэх биш. Хамтдаа автобус унаанд суухаар хүмүүс их харна аа. Ямар сайндаа хүнсний 20 дээр буух гэж явснаа гэнэт Ленин клуб дээр буучихна. Яаж байгаа юм гэхээр яршиг, яршиг хүмүүс хараад байх юм. Ганцхан буудал юм чинь алхчихья... гэж байхав дээ.

-Та хоёрт адил төстэй зан чанар байсан болов уу?
-Бий шүү. Их мэдрэмжтэй хоёр доо. Аливаа зүйлийг хараад дүгнэхдээ санаа их нийлнэ. Бас зоримог. Би бага залуудаа мото спорт их сонирхдог байлаа. Бүр бартаат замын уралдаан үзнэ. Тэр үед Чехийн мотоспортынхон хамгийн мундаг нь байлаа. Манай хүн бас их зоримог. Бөхчүүд жийрхэнэ шүү. Олон таван үггүй, шалчигнаад байгаа нөхдүүдийг шууд л цохиод унагачихдаг. "Хүүеэ чи чинь тийм том биетэй хүнийг цохиод унагачихаж байгаа юм уу? гэхээр "Хнн, тэд нарын зодолдох гэж юу байдаг юм. Маажиж, чимхэхээс өөр ид шидгүй" гэдэг байж билээ /инээв/.

-Амьдрал ахуйгаа хэрхэн төвхнүүлж байсан бол...?
-Хэдийгээр том бөхийн хүүхэд ч гэлээ бид бусдын л адил тэгээс л эхэлсэн хоёр. Эхний гурван хүүхдээ гарчихсан байхад айл айлын өрөө дамжаад амьдардаг байлаа. Зарим үед 7 буудал, Зурагт, Баянхошуунд айлын хашаанд гэр бариад ч амьдарсан. Тэр үед чөлөөтийн бэлтгэлд гарчихаад өглөөний заряткад гүйнгээ хүрч ирэн гал түлж өгчихөөд буцаад гүйгээд явчихна.
Нэг удаа 7 буудалд байхад "40-өөд минут алхдаг юм байна шүү" гэсээр алхаад харьж байсан. Тэр үед такси унаа ховор. Тэгж амьдарсаар нэлээд хэдэн жилийн дараа хань минь дэлхийн армиудын аварга шалгаруулах тэмцээнд аварга болоход Дорж генерал байрны түлхүүр гардуулж байсан даа. Одоо бодоход залуу нас сайхан байжээ. Зовж зүдэрлээ гэж бодох юмгүй инээд алдаад л гүйж явдаг.

-Та одоо ч бөхийн амьдрал дунд байгаа юм байна шүү дээ. Хүү барилдаж байна, хүргэн барилдаж байна?
-Тиймээ. Бөхийнхөө амьдрал дунд л байна. Хүү Төрмагнай маань аймгийн харцага, хүргэн Б.Болдбаатар аймгийн заан цолтой. Манай хадам аав "Танай охидуудаас л бөх гарна даа" гэж их хэлдэг байсан. Тийм алдартай аав, хүү бөхийн удам тасрахгүй, үргэлжилнэ гэдэгт итгэлтэй байдаг шүү, эгч нь.

-Та түрүүн хүүгээ өдөр ирэх тусам аавтайгаа адилхан болоод байна гэж байсан даа?
-Тиймээ. Аавынх нь найз нар ирэхээрээ "Хүний хүүхэд эцгээ дуурайж болдог. Гэхдээ энэ Төрмагнай арай л дэндүү нарийн дуурайжээ" гэдэг юм. Ярьж байгаа, инээж байгаа нь зарим хедөлгөөн нь хүртэл яг шүү. Цочтол харагдана. Эгч нар нь хараад заримдаа уйлчихдаг юм. Бас аав шигээ дуугүй талдаа.

-Та одоо хүүгээ тууштай барилдуулах талаас нь хэр их хэлж, ярьж байгаа вэ?
-Нэг их шахаад шавдуулаад байдаггүй юм аа. Харин аавынх нь барилдаж байх үеийн арга барил, ёс жаягийн талаар нэлээд ярьж өгдөг. Манай хадам аав, хань, хүү гурав минь нийлээд монгол бөхийн бүх цолыг авсан юм шүү дээ. Хадам аав заан цолыг алгасч арслан болсон болохоор заанаас бусад цолыг авсан гэж байх үед миний хань заан болсон.
Сүүлд харцага цол гараад энэ цол л дутуу байна гэж байхад хүү минь аймгийн харцага цол авлаа. Би хүүдээ манайх чинь монгол бөхийн бүх л цолыг авлаа. Миний хүү аймгийн харцага болсон юм одоо улсын харцага болох байх даа гэж хэлж, бэлгэшээж суудаг юм.
Өөрөө ч бөхдөө дуртай, хүү минь. Уг нь дээд сургуулиа англи хэл, аялал жуулчлалын мэргэжлээр төгссөн юм шүү дээ. Мэргэжлээрээ ажилла гэж хэлж чадахгүй юм аа. Дуртай зүйлийнхээ төлөө явж байг дзэ... гэж боддог.

-Та бид хоёрын яриа энэ хүрээд өндөрлөж байна. Сайхан ханийнхаа тухай сайхан яриа өрнүүлсэн танд баярлалаа.
-За баярлапаа. Бөх сониныхоо хамт олон болон нийт уншигчдад хамгийн сайн сайхан бүхнийг хүсэн ерөөе.

Эх сурвалж: “Бөх” сонин,

[magicman]

Золбаяр агсны хөрөг нэвтрүүлэг

[Ganbold]

сайт сонины ярилцлагууд голдуу л засвартай ш дээ..
урьдчилж тохирсон асуудлууд дээрээ ярилцаал явчихдаг юм билээ..
эфир, тв-р шууд явбал эрхэмбаяр аваргын нөгөө "юун улс төр болоод явчихваа" гэдэг шиг л...

[Takanohana_Nowitzki]

Аймгийн Арслан О.Хангай: Өмнө нь давхар ачих мэхийг хийж байгаагүй давтаж ч байгаагүй, барилдааны явцад л ороод ирсэн


Ховд аймгийн Буянт сумын харьяат аймгийн арслан Оргихийн Хангайг Хүч спорт хороонд бэлтгэл хийж байхад нь ярилцсанаа уншигч та бүхэндээ хүргэж байна. Тэрээр Налайх дүүргийн Онцгой байдлын алба, Автобус-1 компани, Ховд нутгийн хөгжлийн төлөө сан, Ховд дэвжээнд харьяалагддаг билээ.

-Ярилцлагынхаа эхэнд бага нас ба бөхийн спорт руу анх орсон үеэ эргэн дурсана уу?

-Би Ховд аймгийн Буянт суманд төрж өссөн. Багадаа бөхийн бэлтгэл огт хийж байгаагүй. 2007 онд арван жилээ төгсөөд ХААИС-д элсэн орсон. Барилддаггүй байж байгаад гуравдугаар курсээсээ бөхийн спорт руу орон барилдаж эхэлсэн дээ.

Ховд аймгийн Ховд суманд очиж барилдан үзүүрлээд сумын начин цол авсан.Үүндээ урамшаад монгол эр хүн байна, сайхан бие хаа байна, барилдаад үзье гээд бэлтгэл хийж эхэлсэн.

-Таныг бөх болоход урамшуулж дэмжсэн хүмүүс гэвэл...?

-Аавын дүү Алтанбагана ах надад зодог шуудаг авч өгч байсан. Тэгээд нэг cap гаруй Б.Адьяахүү багшаар гараа дэвээ, барилдааны анхан шатны мэдэгдэхүүн заалгаад, дараа нь Ховд бөхийн дэвжээнд Мягмарсүрэн зааны удирдлага дор одоог хүртэл бэлтгэл сургуулилт хийж байна.

-Та анх сумын цолтнуудын барилдаанаас хүч түрэн гарч ирснийг хүмүүс мэднэ?

-Би Ховд аймгийн Мөнххайрхан суманд 2011 онд түрүүлж сумын заан цол авсан.Тэр намраасаа сумын цолтой бөхчүүдийн барилдаанд барилдаж эхэлсэн. Тэр барилдаанд нэг шөвгөрөөд өөртөө урам орж бэлтгэл сургуулилтаа эрчимжүүлж эхэлсэн дээ. Багануурт бас сумын заануудын барилдаанд хоёр, гурав шөвгөрч байсан.

Бас тухайн үед зохиогдож байсан "Нутгаа дуурсгана" барилдаанд манай багш Мягмарсүрэн заан намайг барилдуулж анх улсын цолтой бөхчүүдтэй барилдаж үзсэн. Энэ бас тухайн жилийн бэлтгэл сургуулилт болон барилдах арга барилаа олоход чухал нөлөөлсөн шүү.

-Нутгаа дуурсгана барилдаанд анх улсын цолтой бөхчүүдээс хэнийг давав?

-Батмөнх зааныг начин цолтой байхад нь анх давж байсан. Тэр үед манай багийн таван бөхийг давчихаад зургадугаар тойрогт надтай таарч барилдан би давсан юм. Тэр барилдаан санаанаас гардаггүй. Тухайн үедээ их баярлаж байлай.

-Ойрмогхон болсон гурван ч барилдаанд улсын заан Батмөнхтэй барилдлаа. Энэ барилдаануудынхаа талаар ярина уу?

-Хоёр удаа дөрвийн даваанд таарч би давж, нэг удаа намайг амлаж хаясан. Улсын заан цолтой хүнийг хаяж, унаж яваадаа баяртай байна.

-Аймгийн баяр наадамд хэр барилдаж байна?

-Сумын заан болсныхоо дараа жил 2012 онд Ховд аймгийнхаа наадамд үзүүрлэж аймгийн заан цол авсан. Тэгээд хавар нь Бүх цэргийн наадмаар тав даван шөвгөрч чимэг нэмсэн. 2013 онд Ховд аймгийн баяр наадамд аймгийн заан Бадамгаравтай түрүү булаалдаж түрүүлсэнээр аймгийн арслан болсон.

-2013 оны хаалтын барилдаанд улсын начин Б.Пүрэвсайхан түрүүлж, 2014 оны нээлтын барилдаанд та түрүүлсэн. Энэ жил Ховдын бөхчүүд одтой байна аа?

-Бас 2013 оны сумын цолтой бөхчүүдын хаалтын барилдаанд манай сумын заан Б.Баянмөнх түрүүлсэн юм шүү дээ. Оны эхэнд 1-р сарын 5-нд болсон " Талх чихэр" ХХК-ны нэрэмжит аймаг цэргийн цолтой бөхийн барилдаанд би түрүүлсэн. Манай Ховд нутгийн бөхчүүд энэ жил их сайхан өнгөтэй байна.

-Модон морин жилийн cap шинийн баярт зориулсан барилдаанд амжилттай барилдаж үзүүрлэсэн. Улсын аварга Мөнхбат, улсын арслан Мөнхбаатар хоёрыг нэг мэхээр давсан. Энэ мэхээ ер нь төлөвлөж гарсан уу?

-Ер нь явж барилдья гэж бодсон. Тухайн үед хоёуланг нь давхар ачиж хаясан. Өмнө нь давхар ачих мэхийг хийж байгаагүй давтаж ч байгаагүй, барилдааны явцад л ороод ирсэн. Аварга , арслан цолтой бөхчүүдийг хаясандаа баяртай байгаа.

-Таныг түрүү булаалдахаар гарахын өмнө Батзориг заан зөвлөгөө өгч байгаа харагдсан. Гарьдтай барилдсан барилдааныхаа талаар яриач..?

-Заан маань "Явж барилд, өөрийнхөө шийдсэн мэхээ хийж барилдаарай" гэж захисан. Гарьд нягт барилдаантай болохоор хаях боломж олдоогүй. Золгоод л тавьчихаад байсан. Сүүлдээ тэгээд барьц сонгож үзье гэсэн бодол төрсөн. Тэгээд гарьдын талаар буугаад гарьд давсан.

Тэр барилдаанд би сайн барилдсан залуу бөхчүүдэд өгдөг шагналаас авчих юмсан гэсэн зорилготой барилдсан. Тэрнээс биш түрүү булаалдана гэж бодоогүй. Тухайн өдөр одтой сайхан барилдаж үзүүрлэсэндээ баяртай байна аа.

-Цагаан сарын аймаг цэргийн цолтой бөхчүүдийн барилдаанд барилдаагүй санагдана?

-Тэгэхэд би жаахан бэртэлтэй байсан. Хавиргандаа бэртэлтэй байсан болохоор гам барьж байгаад барилдсан.



-Та аавынхаа талаар ярина уу? Аав тань тариаланч хүн байдаг гэж сонссон?

-Манай аав Говь-Алтай аймгийн Жаргалан сумын харьяат хүн. Улсын тэргүүний тариаланч хүн бий. Ховд аймаг бол тариалангийн өлгий нутаг. Ховдын төмс, Ховдын шийгуа гээд алдартай шүү дээ. Аав минь анх ХААИС-ийг төгсөөд Ховдод хувиарлагдаж очоод тэнд ээжтэй танилцаж гэр бүл болсон юм билээ.

Манайх ам бүл зургуулаа. Би дороо гурван эмэгтэй дүүтэй. Аав маань намайг бага байхад бөх болно оо гэдэг байсан. Аавынхаа хүслийг биелүүлж яваадаа баяртай явдаг.

- Бөхчүүд аавынхаа төрсөн нутгаар харьяалж барилдах нь элбэг байдаг. Та яагаад Ховд аймгийн Буянт сумаар дуудуулдаг юм бол...?

-Би Ховд аймагт төрж өссөн. Манай багш Ховд аймгийнх, би өөрөө Ховд дэвжээндээ бэлтгэл хийдэг болохоороо Ховд аймгаар харьяалагдаж барилддаг.

-Барьц сонгуулсан байдлаас ч давж байгаа харагддаг, барилдааныхаа онцлогоос уншигчдадаа сонирхуулна уу?

-Бэлтгэл дээр барьц сонгуулсан байдлаас яаж хаях вэ гээд л барьцийг нь тавиулах, шахаж татах гээд л их давтдаг. Ер нь бол тухайн хүндээ тохируулж барилдахыг хичээдэг. Золгож голцуу барилддаг даа.

-Баасанхүү начинтай цагаан сараар, бас саяхан таарч давсан... Жижиг биетэй бөхтэй барилдахад ямар санагддаг вэ?

-Их эвгүй шүү. Хөл рүү орчих гээд... Баасанхүү начин их элдэвтэй. Уран хурц барилдаантай. Өнгөрсөн жил би аймгийн заан цолтой байхдаа гурав унасан. Олон унасан болохоор алдаан дээрээ суралцаад сүүлд хоёр удаа даваад байна.

-Бөхчүүдээс хэн хэнтэй ойр дотно найзалдаг вэ?

-Улсын начин Пүрэвсайхан, аймгийн заан Бадамгарав, аймгийн харцага Төмөрбаатар, аймгийн начин Адьяа, сумын заан Баянмөнх гээд хамт бэлтгэл сургуулилт хийдэг бөхчүүдтэйгээ найзална даа.

-Долоо хоногт хэдэн удаа бэлтгэл хийж байна?

-Хүч спорт хороонд долоо хоногт хоёр удаа үндэсний бөхийн бэлтгэл, гурван удаа хүчний бэлтгэл хийдэг.

-Барилдахаас гадна волейбол тоглодог гэсэн. Энэ тухайгаа..?

-Өөрийнхөө хэмжээнд боломжийн тоглоно оо. Арван жилд байхдаа волейболоор аймгаасаа шалгараад өсвөрийн улсын аваргад орж байсан.

-Биеийн жин, өндөр хэдтэй байна?

-Жин 120 кг, өндөр 1 метр 96 см байгаа.

-Чөлөөт цагаараа юу хийдэг вэ?

-Хааяа нэг зааланд тоглоно. Бэлтгэл хийгээд амрахыг л боддог.

-Гэр бүлтэй болж амжсан уу?

-Одоохондоо болж амжаагүй. Гэхдээ найз охинтой.

-Спорт бол залуу насны ажил, та ирээдүйд юу хийх бодолтой байна?

-Тэгэлгүй яахав.Би ХААИС-ийг Газар зохион байгуулалтын инженер мэргэжлээр төгссөн.Одоогоор бөхөөрөө дагнаад хажуугаар нь сургуульд сурах бодолтой байгаа.

-Заан цолны хүндэтгэлийн барилдаанд та үзүүрлэлээ. Энэ барилдааныхаа тухай ярьж өгнө үү?

-Цагаан сараар үзүүрлэсэнээ бататгаж өөрийнхөө хэмжээнд боломжийн барилдаж дөрөвт үлдээд Санжаадамба заантай тунасан. Тэр барилдаан дээр сэтгэл жаахан эвгүй болсон. Тухайн үед засуул намайг барьсан шүү гэж хэлсэн. Тэрийг Санжаадамба заан сонсоогүй, надад мэх хийсэн юм шиг байна лээ.

Би өөрийгөө зөвтгөх нь ч хаашаа юм. Санжаадамба зааныг буруутгах нь ч хаашаа юм, засуулийг буруутгах нь ч бас хаашаа юм. Нэг тиймэрхүү барилдаан болсон. Яг барилдаж даваагүй болохоор сэтгэл дундуур байгаа. Сайхан барилдаад унасан бол яахав дээ, сайхан үзээд уналаа гэж бодно.

Санжаадамба зааныг элэг бүсээ тайлахаар нь би тахимаа өгье гэж бодсон л доо. Тэгээд багшаасаа эмээгээд очиж асуусан чинь багш маань хамаагүй. тэгж болдоггүй юм. Ерөнхий цэцийн шийдвэр гарахыг хүлээ гэсэн. Тэгээд багшийнхаа үгэнд орсон. Тийм л юм болсон доо.

-За сайхан ярилцсанд баярлалаа . Эргээд улсын цолтой уулзацгаая.

МУБИС, БТС Б.Балжинням [url]undesniibukh.mn[/url]

[magicman]

Хангай 196 см өндөртэй юм уу??

[ТӨӨГӨӨ]

Юу гэж дээ

[Takanohana_Nowitzki]

нээрээ 190 ч хүрэхгүй биз дээ?

[Чуугий]

186г 196 гээд бичцэн юм байлгүй дээ.

[Болдгэрэл]

Хөвсгөлийн Батчулуун-тай ер нь ойролцоо юм билээ. 90 арай хүрэхгүй байх аа ..........

[chuluu]

Мажикмэн дээрхи нэвтрүүлгийнхээ линкийг нь өгөөч миний ком дээр танихгүй юм

[Takanohana_Nowitzki]

Золбаяр агсны хөрөг нэвтрүүлэг

https://www.youtube.com/watch?v=8bjhO_4hjkk

[Aagii_03]

Золбаяр агсны хөрөг нэвтрүүлэг

https://www.youtube.com/watch?v=8bjhO_4hjkk

[Өсөхбаяр]

Гончигдамбын ярилцлагыг уншсан Цэрэнтогтох аваргын яриа санаанд орж бншт.

[Тошилоо]

ӨДрийн сонин дээр цолчин засуул Пүрэв гуайн ярилцлага гарсан байна лээ
начны найрааг Мөнхбат, Цэрэнтогтох, Сосорбарам, Дагвасүрэн нараас эхлэлтэй
Сүхбатын Өсөхбаяр аваргыг тийрдэг үеийн ам мэх
Ганбатын Өсөхбаярыг давж түрүүлдэг үеийн ам мэхний талаар ярьсан байна лээ
сайхан ярицлага

[Takanohana_Nowitzki]

ӨДрийн сонин дээр цолчин засуул Пүрэв гуайн ярилцлага гарсан байна лээ
начны найрааг Мөнхбат, Цэрэнтогтох, Сосорбарам, Дагвасүрэн нараас эхлэлтэй
Сүхбатын Өсөхбаяр аваргыг тийрдэг үеийн ам мэх
Ганбатын Өсөхбаярыг давж түрүүлдэг үеийн ам мэхний талаар ярьсан байна лээ
сайхан ярицлага

Файлаар байхгүй биз?

[Dondogoo]

Ганбат бас ам мэхчихсэн юм уу сэргэлэн золиг вэ

[Цоомоо]

ӨДрийн сонин дээр цолчин засуул Пүрэв гуайн ярилцлага гарсан байна лээ
начны найрааг Мөнхбат, Цэрэнтогтох, Сосорбарам, Дагвасүрэн нараас эхлэлтэй
Сүхбатын Өсөхбаяр аваргыг тийрдэг үеийн ам мэх
Ганбатын Өсөхбаярыг давж түрүүлдэг үеийн ам мэхний талаар ярьсан байна лээ
сайхан ярицлага

Файлаар байхгүй биз?

Өдрийн сонин дээр байхгүй байна, баахан дугаар авчруулаад үзлээ.
Яагаад худлаа яриад байна аа.

[Барнаба]

Ганбат бас ам мэхчихсэн юм уу сэргэлэн золиг вэ

Худлаа байх өө, хэсэг үзэж байгаад золголцох уу гээд золгох шиг болсон шт. Өндөр арай дийлэхээргүй байсан л даа уулаасаа.