by turuue » Mon Feb 01, 2016 4:39 pm
Барселон 2-1 Атлетико Мадрид | Ла Лиг 22-р тойрогХэдий түүхэн ач холбогдлоороо Эль Класикод хүрэхгүй ч сүүлийн хэдэн жил лигийн хувь заяаг шийддэг гол тоглолтуудын нэг болсон гэдгийг баталсан 90 минут болж блауграна өмсгөлтний ялалтаар өндөрлөлөө. Шүгэл дуугарахын өмнө олон ч хүн үүнийг энэ улирлын Ла Лигийн хамгийн чухал шийдвэрлэх тоглолт хэмээж байсан ба үнэхээр ч лигийн хувь заяаг нэг мөр заачихсан байж ч болохуйц үр дүнгээр төгслөө. Ингэснээр Барселон клуб Мадридын хоёр багаас тус бүр гурав ба дөрвөн онооны илүүтэй болсны зэрэгцээ нөхөн тоглолтондоо хожчихвол ч зургаа, долоо онооны ч зай үүсэх нөхцөл бий.
Атлетико Мадрид тоглолтыг санаснаас эрс өөрөөр эхлүүлж тооны харьцааг нээсэн. Харин Барселон клуб хариуг нь удаалгүй барьж, Альбагийн дамжуулалтаар Мэсси гоолдсон. Энэ гоол дээр Нэймар найруулагчийн, тоглогчийн хувиар хэрхэн өөрчлөгдөж байгаа нь ч харагдсан. Өнгөрсөн оны Нэймар магадгүй өөрөө цохиод алдах байсан байх, харин одоо тоглолтоо илүү урсгалаар явуулж зөв моментыг хүлээж, бас үүсгэж, үргэлжлүүлэн хөгжсөөр байна. Гоолын дараа ч Барса үргэлжлүүлэн довтолсоор тоглолтын хожлын гоолыг Алвесийн дамжуулалтаар Суарес шигтгэх нь тэр. Өнгөрсөн жил харсан нэг гоолынхоо давталтыг үзчих шиг л болсон доо! Алвес-Суарес гэсэн хослол өнгөрсөн хаврын Класикод оруулсан гоолоо яг давтсан нь энэ юм. Суарес ч өөрийн мэдрэмжээ энэ гоол дээрээ хангалттай харуулсан. Биеэ ашиглаж бөмбөгөө яаж хашиж өөрт ашигтай боломж үүсгэж байгаа нь гайхалтай. Бөмбөг Суаресийн хөлд ирээгүй ч аль хэдийн түүнийх болсон байдаг аж.
Манай довтолгооны их гурвал Мэсси, Нэймар, Суарес-МСН уламжлал ёсоор багийнхаа гоолуудыг оруулж, хувь нэмрээ оруулсан ч, энэ өдөр хэн нь ч бүрэн фит байсангүй, ялангуяа Мэсси, Нэймар хоёр. Хэн хэн нь гоёмсог оролтууд толилуулсан ч тоглолтын нийт өгөөж нь яагаад ч ерийн үеийнх шигээ өндөр байсангүй. Мэсси бэртлээсээ бүрэн сэргээгүй байгаа бол Нэй-д ажлын өдөр Атлетикийн эсрэг байдгаа шавхчихсан нь нөлөөлсөн биз. Хоёрдугаар хагаст тэсрээд гүйхэд хүртэл зовиурлаад байсан нь илт.
Эхний үеийн төгсгөлд тоглолтын эхнээс л хэт ширүүн дориун тоглож байсан Фэлипе Луис алдаа Мэсси дээр гаргаснаар улаан хуудас хүртэж хөөгдсөн. Жаахан эвгүйтэхэд Леогийн карьерийг ч өндөрлүүлж болохоор ноцтой үйлдэл байсан тул гарцаа байхгүй улаан хуудас. 2014 онд Мэсси гуяны арын шөрмөсний бэртлээс эргэж ирсний дараахан Атлетигийн эсрэг тоглох үеэр Годин багийн анд Миранда руу Мэссигийн хамстрингийг дэлсээд ав гэх дохио өгсөн нь камерт тод үлдсэнийг күле нар одоо ч тод санадаг нь гарцаагүй. Мэсси АТМ-ийн эсрэг тоглох үедээ 5 удаа том жижиг бэртэл гэмтэл авч байсан нь санамсаргүй хэрэг биш билээ.
Хэдий арвуулаа үедээ ч Атлети мундаг байж сайн довтолгоо зохион байгуулж тооны харьцааг эргүүлэхээ дөхсөн. Хэрвээ Браво амин чухал мөчид гялалзаагүй бол үр дүн өөр байх байсан нь тодорхой биз.
Хоёрдугаар үед Годин эх орон нэгт Луисито дээрээ алдаа гаргаж хоёр дах шар хуудсаа хүртсэнээр тоглолтын хувь заяа нэгэнт шийдэгдсэн. Бага зэрэг хатуудсан шийдвэр ч байж мэднэ.
Тоглолтын шилдэг нь Барсагаас Пике, Атлетигаас Карраско байв. Карраско тоглолтын турш талбайн эздийг огт амар заяаг нь үзүүлээгүй бол Пике багийн зүрх болсон тоглогч гэдгээ дахин нэг баталсан.
Директ Барса, нээлттэй Атлети буюу хоёр баг бие биеэсээ суралцсаарОнцлох тоглолт байсны хувьд олон ч томчуул өөр өөрийн өмнөтгөл, анализуудаа нийтэлсэн. Үүн дотор "Зонал Маркинг"-н Майкл Кокс өөрийн ESPN дэх нийтлэлдээ энэ хоёр баг ойрын жилүүдэд хэн хэнээсээ суралцаж, харилцан хувьсаж байгааг онцолсон байв. Тэрээр хэлэхдээ "Барсагийн голлох сул талуудын нэг нь хангалтгүй тоглосон үедээ аргацаасан хожил (ugly win) авч чаддаггүй нь байсан ба сүүлийн үед энэ нь эрс өөрчлөгдөж хэдий сулбагар тоглож илт илүүрхэж чадаагүй үедээ ч яаж ийгээд хожчихоод байдаг болсон" гээд үүгээрээ тэд Атлетитай адил төстэй болж буйг дурдсан байна. Мөн довтолгоонд илүү директ, хамгаалалтанд компакт болж буй нь Мадридын багтай ижилсэж буй шинж гэнэ. Түүнийхээр Барса АТМ-аас Ардаг худалдаж авсан нь ч Атлетигийн стилиэс таашаах зүйлээ таашааж, авах зүйлээ авсан нь тэр аж.
Харин Атлетико Мадридын хувьд хамгаалалт, сөрөг довтолгоонд суурилсан, "догшин ширүүн" гэж танигдсан баг. Хатуу сахилга баттай, сайн дасгалжуулагчтай баг нэг удаагийн гайхамшигт ялалтанд хүрэх нь бий. Харин урт хугацааны амжилтанд хүрье гэвэл сайн довтолгоо, олон жил тэсч үлдэх уян хатан философи хэрэгтэй. Атлети ч энэ замаар замнаж, илүү нээлттэй, санаачилга өндөртэй, бүтээгч баг болохыг зорьж буй нь илт.
Тоглолт бүхэлдээ л Майкл Коксын энэхүү сонирхолтой ажиглалтыг баталчихсан. Барселон клуб довтолгоо хамгаалалтаар илт илүүрхээгүй, гоолын боломж ч эсрэг багаасаа онцгой олныг үүсгээгүй, их гурвал МСН-ийнх нь хэн нь ч 100 хувь байсангүй. Гэсэн ч тэд яг л хэрэгтэй үедээ гоолдоод "яаж ийгээд" л гурван оноогоо халаасласан. Харин Атлети бидний мэддэгээс шал өөр тоглолт үзүүлж, эхний минутаас л маш хүчтэй нэхэж, Барсагийн хамгаалалтаас дундын шугам хүрэх шилжилтийн балансыг алдуулж тоглолтыг бүрэн өөрсдийн гарт авсан. Үүнийхээ ч үрээр удаа дараа гоолын боломж үүсгэж гоолын салхийг хагалсан. Хоёр гоол алдсаныхаа дараа, улаан хуудас аваад арвуулаа, дараа нь бүр есүүлээ үлдсэнийхээ дараа ч тэд хойш суугаагүй, боломж гарах бүрд ширүүн довтолж эгзэгтэй моментууд ч үүсгэж байв. Үнэхээр шал өөр АТМ-г бид харсан. Нээлттэй, задгай, урьдаасаа өндөр амбицтай Атлети байсан. Клубын хувьд нэг шат ахиж, аварга, бүр аваргуудын аварга болох хүсэл зоригтой, илүү доминант баг болох эрмэлзлэлтэй Атлети байсан.
Ялагчийн сэтгэл зүйТатагийн Барса, Лучогийн Барсагийн хамгийн том ялгаа юу вэ? Татагийн Барса эхний 70 мин-д нь тооны харьцааг холдуулж чадахгүй эсвэл эхний гоолыг алдчихвал бол хожно гэх найдлагаа бүрэн алддаг, үнэхээр тэр тохиолдолд барагтай хождоггүй байв. Харин Лучогийн Барса тийм биш. Гоол алдсаны дараа бүр ч хүчтэй тэсэрдэг, дор нь эргүүлж барьдаг. Тоглолтын эцсийн мөчүүдэд ч зогсолгүй довтлох орон зайг хайж, зүүний сүвэгчээр ч болов багтаж ороод үр дүнг өөрийн талд эргүүлдэг дайчин сэтгэхүйтэй.
Энэ улирал Барса найм дах тоглолтондоо хожигдож яваад эргэлт хийж хожлоо. Улирал төгсөхөд нилээн ихэссэн байх биз. Ингэж бодож суугаад ийм нэг гоё жиргээ уншчихлаа.
(CV дээрээ Барса фэн гэдгээ бич тэгвэл таныг ялагчийн сэтгэл зүйтэйг ойлгоно.
)
Хүчтэй нь биш өөрчлөгдөх чадвартай нь тэсч үлдэнэӨнгөрсөн өвлөөс хойш тун цөөн клубууд л Лучогийн Барсагийн эсрэг амжилт олсон. Зөвхөн үр дүн гэхээс илүү агуулгын хувьд сайн чанартай гүйцэтгэл толиуулсан энэ багуудыг ажвал тэдэнд нэг нийтлэг шинж бий. Арагш сууж, идэвхгүй горимд шилжилгүй, харин ч зоригтой, хүчтэй прэссинг хийж, шугам сольсон шилжилтүүдийг нураах нь энэ Барсагийн эсрэг хамгийн сайн үйлчилж байна. Өнгөрсөн улирлын турш эрчтэй нэхэлтийн эсрэг сайн хариулт барьж чадахгүй хэцүүдээд байсан ба энэ улирлаас илүү ихээр судлагдаж энэ сул тал нь бүр л тодорсоор. Тийм ч учраас Барселон клубт класс гүний найруулагч (deep lying playmaker) хэрэгтэй байгаа билээ.
Энэ тоглолтын өмнө Малага, Атлетик клубуудын эсрэг ч энэ сул тал тод харагдсан учраас Симеоне тоглолтын эхнээс л өндөр эрчээр бүтэн талбайн нэхэлт хийсэн. Ингэснээр Барсагийн шугам сольсон шилжилтүүд амжилтгүй болж тэр хэрээрээ МСН-д бөмбөг хүрэх нь багасч, довтолгооны оролдлого ч цөөн хийхэд хүрдэг. Энэ нь магадгүй Барсагийн довтолгоог хазаарлах хамгийн үр дүнтэй арга, цаашлаад эсрэг баг ч илүү олон довтолгоо ашигтай байрлалаас зохион байгуулах боломжтой болдог.
Аварга болох нэг хэрэг, түүнээ хадгалж үлдэх нь тусдаа асуудал. Оройд байгаагийн хувьд бүгдэд харагдаж илүү ихээр судлагдана. Тэр хэрээрээ шинийг сэдэж, илүү хурдтай урагшилж байх шаардлагатай. Пэпийн Барса дах амжилттай эринийг ингэж их гоёор хэлсэн баййдаг: “Өрсөлдөгчид хариултыг нь олох бүрд Пэп асуултаа өөрчлөөд байв.” Лучо өөрийн гэсэн системээ чамбай гэгч нь босгож чадсан, түүний чанарыг ч хангалттай баталсан. Одоо түүнээ шинэчилж хөгжүүлж байх шинэ даалгавартай тулж байгаа нь энэ.
Эцэст ньХоёр багийнй одоо хаана байгаа, цаашдаа хаашаа зүтгэж байгааг тод илтгэсэн тоглолт болоо. Эхний 60 минут Аваргуудын Лигийн шигшээ тоглолтын дайтай маш чанартай өрнөсөн ч Атлетигийн хоёр дах улаан хуудасны дараа тэр чигтээ унтарсан. АТМ-н энэ хэт ширүүн тоглолт нь галаар тоглож байгаа мэт. Түймэр тавьж ч чадах боловч зарим үед өөрсдийгөө түлчих эрсдэлтэй. Энэ удаа тэд хэт ширүүлсээр өөрсдийгөө түлсэн нь энэ.
Төгсгөлд 9 хүнтэй багийн эсрэг гоолдчихсонгүй гээд күле нар гонсойж болох ч манайх хамгийн чухал эгзэгтэй мөчид хариуг нь барьж гоолдож чадсан. Мөн он гараад 1-р сар уламжлал ёсоор маш шахуу хуваарьтай учраас баг гурав хоног тутамд л нэг тоглоод байгаа үед үр дүн хамгийн чухал. Гүйцэтгэл хангалтгүй байсан байж болох ч аминд тулсан чухал мөчид хийх ёстойгоо гүйцэлдүүлж чадсан.
Барселон клуб 1-р сард ес тоглохдоо найм хожиж, нэг тэнцлээ. Найм дараалсан ялалт. Лучогийн доорх рекорд нь 11. Мөн намар Сэвияад хожигдсоноос хойш 26 тоглолт дараалан ялагдсангүй. Пэпийн Барса 28 тоглолт дараалан ялагдаагүй гэх клубын рекорд амжилтыг ч шинэчлэхэд гайхах зүйлгүй.
Лучогийн Барса цаашдаа ч олон рекорд тогтоож таарна. Гол тоглогчид нь шилдэг тоглолтоо үзүүлээгүй ч хожлын гурвын оноогоо авсан нь хамгийн чухал. Цаашид хол зам байгаа, юу ч болж мэдэх хэдий ч, лигийн цом аль хэдийн нүдэнд харагдаад эхэллээ. Браво Лучо!