Түрүү жил улирлын өмнө ингэж бичиж байжээ.
Яахуу, НБА дээр гарсан preview харьцуулаад, өөрийн саналаа нэмээд...
Уншсан чинь сонирхолтой л байна.
Юта Жазз – Улирлын өмнөКарлос Бузер өнгөрсөн улиралд дундаж оноо (21.1), минут (34.9), бөмбөг таслалт (1.2) -аар хувийн дээд амжилтуудаа тогтоож, 81 тоглолтонд оролцож, Бүх оддын тоглолтонд уригдсан гэх мэт өөрийн шилдэг улирлаа хийсэн. Ер нь тогтвортой тоглодог, сайн тоглогч.
Гэхдээ Юта Жазын гол хүн биш. Юта бол Дерон Уилльямсын баг. Хэрэв Юта улирлын болоод плей-оффын бүх тоглолтоо өөрийн талбай дээр хийдэг бол маргаангүй лигийн хамгийн шилдэг баг байх байсан. Тэд өнгөрсөн жил талбай дээрээ 37 хожиж, 4 хожигдсон нь Бостоноос 2 хожлоор илүү байсан. Мөн сүүлийн 2 жилийн улирлын тоглолтон талбай дээрээ 82 тоглосноос 70-д нь хожсон. Харин айлын талбай дээр 37-45 гэсэн 50%-ийн амжилтанд ч хүрэхгүй үзүүлэлттэй. Багууд плей-оффт талбай дээрээ олон тоглолт хийхийн төлөө тэмцдэг, үүнд их ач холбогдол өгдөг. Ютагийн хувьд бол плей-оффт талбайдаа олон тоглолт хийх эрх авах нь онцгой чухал асуудал.
Жазз талбайдаа олон тоглолт хийх эрх авахын тулд энэ улиралд өнгөрсөн улирлаас сайн тоглох хэрэгтэй. Ингэхийн тулд тэд ямар өөрчлөлт хийв. “Соутвэст” дивизионы аварга Нью-Орлеанс энэ зун хаана ч ашиг тусаа өгч чаддаг Жеймс Позигоор хүчээ зузаатгасан. “Пасифик” дивизион болон “Өрнөд” конференцийн аварга Лейкерст Андрью Байнум хүч нэмнэ.
Харин Жаззад?
Бараг юу ч өөрчлөгдөөгүй гэж хэлж болно. Драфтын шинэ тоглогчид, мөн Бревин Найтыг л нэмж авсан. Гэхдээ энэ нь тэднийг сайжрахгүй, сайн тоглохгүй гэсэн үг биш. Жерри Слоан багийнхаа гол цөм болох Дерон Уилльямс, Карлос Бузерийн хослолдоо найдаж байгаа, тэд өөрсдөө ч, тэднийг дагаад баг нь ч илүү сайжирна гэж үзсэн болов уу. Юта лигийн топ багуудын тоонд яригддаг, ер нь ирэх улирлуудад ч гэсэн аваргын төлөө өрсөлдөх хэмжээнд байх биз.
Энэ оптимизмийн гол шалтгаан нь магадгүй Дерон Уилльямс. Тэр Ютагийн бүрэлдэхүүний хамгийн авьяастай, ухаантай тоглогч. Дерон Жерри Слоаны довтолгооны гол систем болох заслонтой довтолгоо буюу “pick-and-roll”-ийг гарамгай хийдэг. Тоглолтыг уншиж чаддаг, зохион байгуулж чаддаг. Тэр Крис Полоос удаан л даа, гэхдээ Полоос давуу чанарууд түүнд бас бий. Пол – Дерон 2-ыг байнга л харьцуулж ирсэн, хойшид ч гэсэн харьцуулсаар л байх болно.
Дерон шинэ тоглогчийн улиралдаа 47 тоглолтонд, 2 дахь улиралдаа 80 тоглолтонд гараанд гарч байсан бол өнгөрсөн улиралд бүх 82 тоглолтонд гараанд гарсан. Нэг тоглолтонд дунджаар 18.8 оноо, 10.5 оновчтой дамжуулалт хийж байв. Тэгвэл лигийн агуу тоглогчдын нэг Жон Стоктон 4 улирал тоглосныхоо дараа ч (25 хүрсэн байсан) Жерри Слоаны багийн үндсэн холбогч болоогүй байсан гэдгийг анхаарч үзэхэд илүүдэхгүй. Мөн Стоктон хэзээ ч 17.2 онооноос дээш оноо улиралд дундчилж байгаагүй.
Карлос Бузер “20, 10″ (20-с дээш оноо, 10-аас дээш самбар) эгнээндээ хэвээрээ байх болно. Дерон тэр 2 магадгүй хамгийн сайн ойлголцдог хос байх, одоогоор. Бузер сайн тоглох хэдий ч нэгэн асуудал бас байгаа. Тэр нь улирал дуусаад Юта Бузертэй гэрээ хийх хэрэгтэй болно. Бузерийг ангуучлах баг Майамигаас авахуулаад мундахгүй олон байгаа. Тиймээс Бузерыг авч үлдэх хэрэг гарна.
Мехмет Окур төвийн тоглогч гэхэд холын зайнаас амжилттай довтолдог. Өнгөрсөн улиралд нийт 114 холын шидэлт амжилттай гүйцэтгэсэн нь лигийн төвийн тоглогч нарын хэнийг нь ч дагуулахгүй үзүүлэлт. Ер нь ч холоос шидэж чаддаг жинхэнэ төвийн тоглогч түүнээс гадна Трой Мерфи л байх. Хьюстонтой хийсэн плей-оффын цувралд ялалт байгуулахад Окурын энэ чанар маш их хэрэг болсон. Яо Мин түүнийг 3 онооны шидэлтийн бүсэд хамгаалах гэж гарч ирэх гэсээр байтал Окур аль хэдийн шидэлт хийчихнэ. Энэ улиралд ч гэсэн Окур сайн тоглох биз. Гэхдээ мөн л түүний гэрээг шинэчлэх шаардлага энэ улирлын дараа гарна.
3 жилийн өмнөх шигээ биш болсон ч Андрей Кириленко юу хийхээ, ямар үүрэгтэйгээ мэдэж байгаа. Ронни Брьюр, Пол Миллсап нар ч муугүй тоглогчид. Кайл Корверыг ямар ч бэлтгэлгүй бөмбөг хүлээж авсан ч хамгийн хурдан 3 онооноос шидэж чаддаг тоглогч гэж сонсож байсан юм байна. За тийм биш байлаа ч Корвер холоос найдвартай бөмбөгдөнө. Б. Найт нэгэн үе лигийн шилдэг холбогчдын нэг байсан, одоо тэр цаг өнгөрсөн ч Дероны замены үүргийг давгүй гүйцэтгэх байх.
Тоглогчдын хувьд иймэрхүү бол дасгалжуулагч нь Жерри Слоан. Жерри Слоаныг шүүгчидтэй хамгийн муухай харьцдаг, хамгийн бүдүүлэг үгс хэрэглэдэг дасгалжуулагч гэдэг л юм байна лээ. Гэхдээ энэ ямар хамаа байхав, 21 улирал Ютаг удирдсан энэ хүн ажлаа сайн мэдэж байгаа.
Дероныг 4 дэх улиралдаа улам сайжрахыг үгүйсгэхгүй. Сайжрах ч байх. Тиймээс плей-оффт талбай дээрээ олон тоглолт хийх эрх олж авах нь тийм ч бүтэхгүй зүйл биш. Ютагийн улирлын тоглолтын бодит зорилго конференцтээ эхний 3 байрт орох хавьцаа л болов уу. Яагаад үгүй гэж.
www.sportnews.mn