Аваргуудын лигийн шөвгийн 16-д учраа таарсан “Барселона”, “Челси” клубийн тоглолт Леонел Мессигийн үдэшлэг болов. Тоглолтын дөнгөж гурав дахь минутад аргентин эр гоолдож, багаа салхинд гаргасан бол  үүнээс 17 минутын дараа Осман Дембеле тооны харьцааг холдуулсан. Улмаар 63 дахь минутад Месси 100 дахь гоолоо оруулсан хоёр дахь тоглогч болов. Түүнчлэн “Барселона” клуб 11 жил дараалан Аваргуудын лигийн шөвгийн наймд шалгарч үлдлээ.

Л.Месси Аваргуудын лигт анхны гоолоо 2005 онд Грекийн “Панатинайкос” багийн эсрэг оруулсан бол 50 дахь гоолоо 2012 онд Италийн “Милан” багийн эсрэг шигтгэж байв.

Түүнээс өмнө ийм амжилтад хүрсэн тоглогч Криштиану Роналдугаас өөр үгүй. Испанийн “Реал Мадрид” болон Португалийн шигшээ багийн довтлогч Роналду 144 тоглолтод 100 дахь гоолоо оруулсан бол Месси 123 тоглолтод амжуулжээ.

Аваргуудын лигийн бүх цаг үеийн мэргэн бууч: 

117: Криштиану Роналду (Португал, Реал Мадрид)

100: Леонел Месси (Аргентин, Барселона)

71: Рауль Гонзалес (Испани, Реал Мадрид, Шальке)

56: Руд Ван Нистелрой (Нидерланд, ПСВ Эйндховен, Манчестер Юнайтед, Реал Мадрид)

53: Карим Бензема (Франц, Лион, Реал Мадрид)

50: Тери Анри (Франц, Монако, Арсенал, Барселона)